周日F1墨西哥站平治雙雄又包Q，咸姆頓再贏後，將同車手榜榜首羅斯保嘅距離拉近到19分，但就算咸仔贏晒最後兩站，羅斯保只要拎個第二加第三就夠做總冠軍。法拉利嘅維特爾今站就慘喇，末段同韋特本鬥，後者唔讓路鏟上草地行捷徑以第三名衝線，被罰五秒，維特爾變第三；但上頒獎台後，賽會又秋後算賬判維特爾阻住歷斯亞度，被罰10秒跌到第五，畀咗個季軍歷斯亞度。