特首梁振英早幾日寫咗篇充滿「蟹」味嘅網誌，咩蟹？咪丁蟹囉！總括嚟講，佢想話自己因為要做好人，而做咗啲具爭議、得罪人嘅嘢，例如開發土地，臨尾仲整句「做醜人要有擔當和勇氣」，問你死未？
原來5年前嘅今日，佢一樣講咗句令人難以置信嘅嘢。佢出席教聯會嘅論壇之後話喎，自己唔係黃大仙，所以唔會亂開空頭支票，言下之意係，做唔到嘅嘢佢唔會應承。再睇番佢當年參選嘅宣傳小冊子，第一句就係「我不會為爭取任何一張提名票或選票，作出不能實踐的承諾」噃。
當年確實唔少人好buy梁特呢套，覺得佢係基層救星。既然今日係11月嘅開始，八方亦睇番當年佢本政綱第11頁，至少就見到，研究標準工時立法同逐步降低強積金對沖呢兩項，有冇開到空頭支票？問問工聯會就知。