噚日萬聖夜，好多歐美體壇球星都好應節，其中勒邦占士就扮90年代美劇《Martin》嘅角色Jerome；而盛傳喺皇家馬德里冇咗一哥位嘅基斯坦奴朗拿度（C朗），冇因為咁影響心情，以吸血鬼造型慶祝萬聖節！
艾拉、法明奴勝在得意
皇馬周日宣佈同加里夫巴利續約至2022年，巴利亦喺周一出席簽約儀式；英國傳媒話，「大聖爺」除稅前嘅周薪高達75萬鎊（約709萬港元），換言之年薪係3,900萬鎊，高過年薪3,600萬鎊嘅C朗。唔知皇馬係咪費事呢位葡萄牙球王嬲豬，堅稱巴利續約後只係同隊長沙治奧拉莫斯睇齊，成為隊中人工第二高嘅球員。好彩C朗喺上周六西甲連中三元，幫球隊作客反勝艾拉維斯4:1，所以心情依然好靚，賽後就以吸血鬼造型，同扮V煞嘅朋友齊齊慶祝萬聖節，兼喺社交網站祝球迷萬聖節快樂。
《屍殺熱刺》贊臣倖存
至於曾經喺曼聯同C朗做過隊友、家陣效力意甲祖雲達斯嘅法國後衞艾拉，就扮《娃鬼回魂》入面嘅恐怖娃娃查基（Chucky），而且仲跳埋舞；睇見Chucky扭晒腰，完全冇恐怖嘅感覺，反而仲有啲可愛。另外，利物浦陣中班巴西外援羅拔圖法明奴、菲臘比古天奴同盧卡斯就約埋一齊開萬聖節派對，其中法明奴相當有創意，同老婆以蝙蝠俠同蝙蝠女造型出席。
英超另一間球會熱刺亦有萬聖節活動，搵咗荷蘭前鋒雲遜贊臣、法國中場尼高杜同英格蘭後衞基爾獲加拍番套《屍殺熱刺》。佢哋三個輪流企喺個圓圈裏面，要喺60秒內用足球射死啲喪屍，結果雲遜贊臣成功射死啲喪屍，尼高杜就俾喪屍食咗；基爾獲加殺唔晒但就成功走甩，雲遜贊臣同尼高杜喺度食花生，笑到標眼水咁滯，認真賤鬼格囉。