馬拉松人人都知係跑步比賽喇，原來喺電腦界都有一種唔使跑嘅「黑客馬拉松」Hackathon。唔好聽到黑客就好驚驚，其實七十年代開始流行的「hacker文化」並不等同於程式破解，主要係形容一啲程式編寫高手，鍾意用創意方法突破傳統。而hackathon通常都係科技公司或者學校舉行嘅程式編寫比賽，組員限時之內要完成指定任務。facebook美國總部搞過50次以上，香港最近都有人搞喇！國泰航空10月22至23號舉行咗個24小時Hackathon，15歲或以上就玩得，吸引咗唔少大學生、中學生通宵鬥寫飛機app，馬拉松要跑42.195公里，Hackathon限時24個鐘，除咗考腦力同樣講毅力，又睇睇班學生哥有乜表現喇！
記者追訪咗兩隊隊伍，第一隊由科大同學組成，事前準備功夫較充足，第二隊則係現場組隊，當中有兩位更只是中六學生。24小時對兩隊嚟講都只係剛剛夠用，雖然參賽者事前都有計劃，但同在場導師交流過之後都要大執，兩隊都要到凌晨三、四時才決定好最後大綱，開始全力「砌code」編寫程式，期間只可以小睡一會。
科大組最終以配對鄰座乘客嘅程式「Social Plus」闖入最後六強，透過輸入facebook、linkedln等社交平台資料，配合個人喜好，系統就會自動配對。舉個例說，單身男士可以偏好單身女士坐隔籬，生意人亦有機會搵到潛在商業夥伴傾吓計。中學組雖然入唔到六強決賽，但設計嘅顧客關係管理系統都得到評審好評，佢哋將航空公司嘅會員獎勵計劃同facebook連結，提供特別個人優惠，導師都話實際兼可行，只係present時太緊張影響表現。
最後冠軍設計的是「cxDiscovery」機艙電子雜誌手機應用程式。程式分析乘客個人興趣及喜好，提供互動及個人化的閱讀及購物體驗，評審覺得服務幫到乘客，又幫到廣告商搵潛在客人，可行性亦高。
記者都有搵過香港有冇其他hackathon，不過似乎得大學有搞，比較少大型公開比賽。其實呢類比賽唔只參賽者有得着，對活動搞手都有意義，航空公司的編程導師就覺得同班後生仔交流過，自己都開咗眼界，以前認為唔得嘅嘢都會重新嘗試咁話。
記者：司徒港燊
攝影：黃子偉
