做人難，做女人更難，做懷孕嘅女人就難上加難，點解咁講，因為懷孕嘅女人，係有好多禁忌㗎。
咁日前《蘋果》影到未婚懷孕嘅趙哲妤，唔停口咁食生冷嘢——「乳酪」，原來圈中唔少新手媽媽，喺懷孕時，都會犯禁忌。
甘比
12年，甘比陀住大劉(劉鑾雄)嘅囝囝Joseph Junior嘅時候，佢就同大劉、囡囡劉秀樺一齊去大坑著名嘅日本菜館鮨辰晚膳，即將臨盆嘅甘比仲百無禁忌咁大吃魚生。
湯盈盈
當年盈盈同錢嘉樂奉子成婚，佢陀住大女錢凱晴時，仲要開工拍攝《老表，你好嘢》，收工後，就見到佢一個人去買壽司、魚生，返屋企開餐。
陳妍希
今年7月，妍希BB就宣佈同內地男星陳曉領證結婚，順道公佈埋有咗BB。一個月後，喺北京安胎嘅妍希BB，就喺微博貼咗佢食雪糕嘅相，咁就引嚟大批網民留言，提醒呢位新手媽媽，懷孕唔食得生冷嘢。
林心如
今年7月先同霍建華結婚嘅林心如，隨後就公佈有咗BB，上月佢就同班好姊妹舒淇、徐若瑄等人飯聚，舒淇就喺FB貼相，同大家開心些牙！眼利嘅網民當然又係留言提醒心如懷孕唔飲得酒。