民主黨立法會議員尹兆堅早前發表民調，七成受訪者支持廢除丁權。新界鄉議局噚日開記招，話一眾原居民俾民主黨激親，批評尹兆堅漠視新界人傳統，指調查報告唔客觀、有偏頗喎！鄉議局研究中心主任、即係劉皇發妹夫薛浩然仲話，《基本法》列明原居民建屋權受政府保護，但一直都無政府官員出嚟幫佢哋澄清，令佢哋好似烏坎村居民咁，要行出嚟維權呀！
鄉議局主席劉業強質疑民主黨別有用心，刻意挑起社會矛盾，又話當年港英政府向原居民收地起樓、起集水區，令新界人被迫遷離家園，成條村村民被迫遠渡歐洲謀生，離鄉別井，例如沙田、荃灣等新市鎮，都係原居民犧牲、讓啲地出嚟咋。鄉議局計劃12月4日喺橫洲舉行集會，呼籲新界人齊齊宣洩被人誤會嘅心情。