返到香港，如重回凡塵世界，血壓立即上升，上壓在130以上，乜唔係吖，咁多本地爭議新聞，排山倒海而來，淨係睇梁游兩位民選議員宣誓事件鬧劇，已覺目瞪口呆，一大班五六十歲嘅建制派議員俾兩位思想未成熟嘅兒女輩候任議員搞倒氹氹轉，使出流會手段，已經係一大笑話。
一聲「支那」，勾起不少成年人之憤怒，駡聲不絕，用之以刺激老人家包圍立法會，痛駡梁游，幾順理成章，但證諸過往經驗，建制派組織嘅羣眾示威，多數係老一輩參加，一位阿婆俾電視台記者問及，佢答：「佢哋嘅說話侮辱中華民國……」不知是言為心聲吖，還是背台詞出錯，變成政治不正確。但係不無道理噃：日軍侵華，發動八年戰爭之時，蔣介石領導之中華民國政府嚴正抗議日本使用「支那」一詞，蔣介石係留日軍人，視「支那」為對中華民國人民之莫大侮辱，故此今天示威嗰位阿婆，話「支那」侮辱「中華民國」，唔講「中華人民共和國」算係尊重歷史。中華人民共和國之第一代太陽核心舵手毛澤東在1967年1月24日見日本社會黨議員黑田壽男，講過：「日本皇軍過去侵略佔領了大半個中國，因此中國人民接受了教育，如果沒有日本的侵略，我們現在還在山裏，就不能到北京看京劇了。正是日本皇軍佔領了大半個中國，讓我們建立了許多抗日根據地，為以後的解放戰爭創造了勝利條件……如果需要感謝的話，我倒想感謝日本皇軍侵略中國。」（見大公報網站（takungpo.com，2014-5-29，來源中新網，作者李大倫））。無論保毛派如何詮釋呢段說話，將之美化為幽默或反諷，毛澤東根本就是徹頭徹尾嘅最大現實主義者，中國人民受苦受難的時刻，毛澤東眼中看到的不是國恥，羞辱，侮辱，對「支那」無動於衷，而係睇到奪權機會來了，快啲趁日軍牽制住國民政府軍隊，中共乘機擴大爭奪地盤擴充軍力。真正的共產黨人，不會婆婆媽媽咁為「支那」而憤怒，只會煽動他人憤怒，策劃他人反蔣，爭奪中國政權。歷史證明毛澤東之冷血策略，大獲全勝，故此親口多謝皇軍侵佔大半個中華民國，對共產革命係好事，人民飽受痛苦，就關佢鬼事，嗰位阿婆冇錯呀，「支那」係侮辱中華民國嘅，與「中華人民共和國」無關。1945年8月日本投降，至今已有71年，胡國興當時還未出世，叫今日廿零歲嘅梁游一輩認識「支那」之痛，根本不可能，或者又唔讀書，他倆咪輕輕鬆鬆咁冒犯中國人囉。