自從領隊干地改用三後衞陣式後，車路士可謂越戰越勇，計埋周日作客2:0擊敗「聖人」修咸頓，聯賽四連勝兼冇失波，亦步亦趨升上英超第四位，只係落後榜首曼城一分，爭標絕對不是夢。
後防穩陣之餘，都要前線入到波先得，比利時中場夏薩特今季就全面回勇，呢場波六分鐘右路窄位扣過對手，再射破修咸頓門將費沙科士打嘅大細龍門，幫車仔開紀錄；英國傳媒就認真心水清，話夏薩特呢個入波同車仔名宿蘇拿喺1997年射破曼聯嗰球如出一轍，唔知夏薩特有冇向蘇拿偷師呢？點都好，夏薩特上季踢咗31場先入四球，今季已經入咗五球喇。車仔下半場由西班牙前鋒迪亞高哥斯達奠勝，DC亦累積第八個入球，壓住同得七球嘅阿古路同盧卡古，上番英超射手榜首。