美國大選越臨近，大家越想到奧巴馬的好，發覺得眼前兩個候選人眼寃。上周一條短片，充分凸顯奧巴馬的可愛。
話說總統先生又上電視清談節目，這次是《Jimmy kimmel Live!》的Mean Tweet環節，顧名思義，參與的嘉賓會當眾讀出對自己尖酸刻薄的tweets博觀眾一粲。
一心助選的奧巴馬梗係唔放過揶揄特朗普的機會，在唸出多條無厘頭tweets後，壓軸他讀這條：「奧巴馬將以美國歷來最屎總統卸任。」他一說推文者為 realDonaldTrump，已經哄堂大笑，但更「啜核」的是他那「子華」段數的回應，他一臉不在乎，說：「但我起碼是個卸任總統！」一句串爆恨做總統恨到發燒的特朗普，此話一出，掌聲雷動。
哈哈哈，識得自嘲，能從容瀟灑面對劣評，梗係輪唔到方丈和葉劉，環顧香江，不過雙曾，尤其財爺，大日子臨近，越見揮灑自如。
你看酸葡萄話佢hea住做財爺，佢笑笑囗答，司長個位其實都幾重要，要喺政府hea做十年，都要幾有天份。嗱，輕輕鬆鬆又KO無聊批評。
還有，一街追問佢幾時宣佈參選，佢去開睇話劇，索性人抽佢水佢又抽人，借莎翁名句又「hea」答：「To run or not to run, that is the question!」
其實近日企業間另一個神級解嘲案例來自英航，某日其官方facebook唔知點解shared了競爭對手維珍航空的宣傳廣告，英航唔單止冇刪post ，仲懶幽默補句：「終於我們有些一致看法了（要去倫敦玩），除了如何點樣飛去。」一笑解窘，講幽默感，外國人真係得㗎。
彭瑪莉
mailto:[email protected]