昨日哈囉喂，「攞正牌」扮鬼扮馬嚇人，港鐵官方fb fan專頁都唔執輸，前晚出post講「傳說」，似乎係想借鐵路鬼故嚇人呃like。個post話「傳說中……大家有無聽過或者諗過彩虹站月台中間嗰條路軌係去邊嘅呢？有人話……佢係通往……」
港鐵fb fan專頁仲落埋「#細膽者慎入」、「#行慢鏡」hashtag，不過就故弄玄虛，昨日先講答案，叫人mark實佢哋個page。此post很快已有逾千人讚好，逾5萬人次瀏覽。至昨日中午，終於開估，上載咗一段快鏡效果片段，「答案係……通往九龍灣車廠！」專頁解釋，一般列車出入車廠、或有車務調配先會用到呢個月台，「我哋今次仲咁啱遇著列車洗白白，點可以唔同大家share呢段千載難逢嘅畫面」。
「彩虹站鬼故」其實已流傳多年，傳聞話當年初起地鐵時，彩虹站只得兩條路軌，但當年外籍工程師等一行人第一次試行車時，由彩虹站去九龍灣站行咗好耐先出番嚟，當時大家都好緊張，以為架車在隧道內出意外，無線電通訊亦都冇反應，10多分鐘後架車出現，但車上眾人好似嚇傻咗咁，之後再試車都係咁，有指原來有「高人」發現條路軌方向係通向「鬼門關」，有傳港鐵因此最終決定起另一起路軌，之後通車測試就再冇問題，結果就有依家呢3條路軌喇。雖然依家大部分時間都係用新嗰條路軌，但亦曾有列車行駛被指「有問題」的路軌，都未有出事，聽傳聞都係嗰句：信不信由你！