政局波譎雲詭，不時都有傳言滿天飛，好似青年新政兩名當選立法會議員梁頌恆同游蕙禎，不時被指係「鬼」，質疑佢哋晝夜無間踏盡面前路，搞港獨係為強硬派嘅梁振英增添連任籌碼云云。雖則佢哋都否認過，但消息繼續滿天飛，而喺政壇都打滾咗一段長時間嘅自由黨榮譽主席田北俊，卻相信佢哋兩個唔係無間道噃，但就話宣誓風波，確實益咗梁振英。
田少噚日就喺商台節目透露，早前曾經同鍾國斌邀約梁、游飯敍（應該唔會係好應景咁去喺天台嘅餐廳啩？），引述兩人席間表明，最想係一國兩制維持落去，但𠵱家覺得一國兩制「變緊樣」，所以先講港獨。
可能聽完兩人訴心聲，田少相信佢兩個唔係無間道，但就認同宣誓風波或增加梁振英連任機會嘅說法，事實上田少都擔心㗎，因為「越講港獨、北京越㷫」，而且亦只會逼到中央更加企喺「一國」立場。佢仲話明白時下年輕人憂慮，唔知2047年時香港會繼續實行一國兩制定轉為一國一制，而「中央領導冇一個答到你」，所以年輕人就用港獨「頂住你個一國一制」。
宣誓風波益CY好唔抵
如果宣誓風波真係益咗CY？相信忠實ABC田少都會覺得好唔抵。而自由黨喺田少冇做立法會議員唔再高舉ABC旗幟，田少就話好諒解，皆因以前自己可以做擋箭牌，中、西環𠵱家則只搵議會嗰4個議員，「難免壓力係大啲」，但都為黨友澄清，佢哋都講ABC，亦都冇話撐CY喎。
李八方
mailto:[email protected]