高調馬主潘蘇通旗下高銀金融（530），喺九龍灣投資嘅高銀金融國際中心噚日正式啟用，早上舉行開幕儀式，呢個時候，又係大家八卦公司老闆同邊班人熟落。
潘蘇通噚日冇搵阿Sa，冇明星或model，佢請來同屬經民聯嘅立法會主席梁君彥、立法會議員林健鋒、石禮謙，仲有思捷（330）主席柯清輝。
唔講真係唔知，柯清輝同潘蘇通係老友，不過兩人都相識滿天下，老友都唔奇，加上思捷總部喺九龍灣，咁近應該要畀面嘅。聞說，港鐵（066）主席馬時亨都有畀面到賀㗎。
講番高銀金融國際中心，高銀金融持股六成，其餘四成由潘蘇通私人持有，頂樓三層（25至27樓）由高銀集團及系內公司承租，作為集團總部。
高銀金融早前與潘蘇通訂立協議，同意通過合營公司透過投標，向香港或中國政府機構收購任何地皮及發展項目，最高總金額200億元，睇嚟潘先生好有意思在港大展拳腳。