八方相當年：
狂煲《E.R.》陳岳鵬諗過做醫生 - 李八方

如果喺史丹福大學讀書時冇遇到葉劉淑儀，政制及內地事務局副局長陳岳鵬Ronald唔知會唔會走上從政路？咪睇Ronald做完區議員再入政府，原來佢細個嘅志願唔係想做官或議員，而係着白袍做醫生，皆因係美劇《仁心仁術》（E.R.）嘅粉絲。

留美涉獵文科轉跑道

現年34歲嘅Ronald家中排第四係孻仔，佢話一直循規蹈矩，好乖兼聽教聽話。小學讀陳瑞祺（喇沙），成績唔係差，但最多時間卻唔係溫書而係參加課外活動，高小開始參加童軍，「童軍嘅活動，無論集會、運動會、學領導才能或步操，我乜都參加」，仲話參加童軍，令佢夠膽試新嘢，而且多咗班朋友一齊行動，個人都活潑同多嘢講咗。
就讀英華中學嘅佢會考獲7A，包括英文，佢話英文唔差可能因為初中已經成日睇明珠台嘅電視劇，包括《仁心仁術》，影響埋大個想做醫生。如果讀醫，家人建議到美國，所以佢會考後到美國麻省讀兩年寄宿學校準備升大學。
點知呢兩年寄宿生涯涉獵學科多咗，例如社會科學、歷史等，「以前讀數理科，好少接觸呢啲，原來自己好鍾意」。
加上人在異鄉特別關心原居地嘅事，Ronald開始對香港時事好有興趣，結果喺史丹福大學先後完成公共政策文學士同政治及比較社會學碩士。之後點樣喺葉劉跑道上起機，八方唔再詳談咯。