曼聯領隊摩連奴喺上周六主場打和般尼0:0場英超，同助理球證豎起四隻手指，究竟係想表達球證卡頓保冇吹四球12碼，定係佢喺聯賽四場都贏唔到？只有佢自己先知。至於我求大俠喺呢場波見到四樣嘢，就係摩連奴鬧球證被逐、伊巴謙莫域好唔掂、安達靴里拉兩黃一紅被逐，同埋曼聯射門37次一球都入唔到。
摩佬被逐料有手尾
曼聯挾住上周中英聯盃16強贏曼城1:0嘅餘威，上周六喺主場同般尼踢英超，成場波佢哋撳住般尼嚟踢，控球率達72%，角球有19個，射門仲有37次咁多，但數據一面倒又如何，咪又係一球都入唔到，最終同般尼踢成0:0，聯賽仲四場不勝，成績係三和一負，近七場聯賽更加只贏過一場，家陣比榜首嘅曼城少八分。
曼聯攻極都唔入，企喺場邊嘅摩佬梗係㷫到爆，睇住達美安喺禁區俾般尼後衞法拿根侵犯都冇12碼，繼而半場休息時喺球員通道向球證卡頓保大發雷霆，結果畀後者趕出場，下半場要坐喺董事包廂睇波兼遙控領軍，仲有可能因行為不檢而畀英足總秋後算賬。
悶和般尼伊巴又食白果
摩佬被逐，佢愛將伊巴亦唔好得佢好多。之前喺打和利物浦0:0場英超，係呢位35歲瑞典前鋒自2015年一月後，首次喺聯賽連續四場冇入波；前晚佢射12次但一次都唔入，結果又食白果，家陣連續六場聯賽冇波入，真係低處未算低。般尼門將湯希頓暗寸佢：「伊巴有球近射，好彩嗰波省中我，但差啲射斷我隻手囉。」曼聯喺68分鐘仲有安達靴里拉領第二面黃牌被逐，其實佢哋呢場波有37次射門，係自2003/04球季有紀錄以嚟單場最多射門嘅聯賽，不過射37次連一球都入唔到，真係好肉酸囉。
曼聯慘被般尼守和兼自己被罰出場，摩佬賽後亦冇接受訪問，由佢助手費利亞代答：「我哋由頭到尾都踢得好好，無論係踢11個抑或踢10個都係控制戰局。我認為球證吹得唔錯，就係咁多。」
話時話，曼聯喺10月真係黑到爆，雖則喺英聯盃淘汰咗死敵曼城，但係喺六場比賽只係攞到兩勝三和一負，相信摩佬、紅魔高層同埋球迷都唔會收貨，希望佢哋可以喺11月轉運，可以由黑魔變番紅魔啦。