利物浦喺上周六嘅英超夜場作客以4:2贏咗水晶宮，而有兩樣嘢喺呢場波係好鬼突出嘅，其一係紅軍嘅鬆散後防，其二係紅軍入球功臣羅拔圖法明奴嗰棚白到反光嘅牙。
洛夫雲、麥迪比將功補過
作客嘅利物浦係16分鐘就憑安利簡恩先開紀錄，但紅軍一對中堅洛夫雲同埋祖爾麥迪比錯漏百出，造就咗水晶宮嘅麥亞瑟兩度頭槌建功。不過，好彩洛夫雲同麥迪比都將功補過，各入一球，加上羅拔圖法明奴亦建一功，紅軍最後以4:2勝出。對於後防成日出錯兼輸頭槌，利物浦領隊高路普賽後就話：「我哋所失嘅第一球絕對係送禮畀水晶宮，而所失嘅第二球亦都係因為防守唔好所致。好彩，我哋入番啲靚波。」
至於賽事嘅第二個焦點，就係為紅軍埋齋嘅法明奴嗰棚勁白嘅牙。其實，法明奴喺一個月前已經將棚牙漂白，不過唔知點解keep得咁好，仲好似越嚟越白；有球迷賽後喺社交網站留言話法明奴棚牙好刺眼，又話連紅軍嘅螢光作客波衫都唔夠佢棚牙咁sharp。唔通法明奴睇得日本漫畫多，想學漫畫入面嘅男主角，每逢一笑棚牙就有閃光？
