幾乎每屆都係特首黑馬嘅行政會議成員陳智思Bernard，喺呢個特首跑馬仔嘅關鍵時刻，當然會被問及有冇心水啦。唔知係咪仲未睇定局勢以免太早押錯注，抑或唔想讚呢個唔讚嗰個惹嚟麻煩事，Bernard噚日開腔逐一評論特首梁振英、財爺曾俊華、退休法官胡國興以及新民黨葉劉淑儀時無一不話好噃，除咗一個，就係自己。
冇人搵佢組班子
佢一直係公職王，形象健康兼且現年51歲相對年輕，向來都被認定係特首黑馬。但佢噚日喺公開場合再三表明自己冇準備參選，亦冇受邀籌組管治班子。
咁現時跑馬仔人選中有冇心水先？佢係港區人大代表，手握一票㗎喎。唔通為免順得哥情失嫂意，Bernard講到個個都係合適之選，佢讚揚鬍鬚曾係理想人選，因為喺政府工作多年，相信佢做得司長都係有能力嘅。咁CY係咪唔好？又唔係喎，佢話CY作為現任特首，對政策議題會有更全面嘅了解喎！
至於蠢蠢欲動嘅葉劉淑儀又如何？Bernard則大讚對方係政務官出身，好認識政府運作㗎。雖則Bernard對胡官認識較少，但話法官對法律嘅認識及公正嘅形象絕對係優勢！聽完唔知Bernard撐邊個？可能佢靠大包圍嚟個通殺。
李八方
mailto:[email protected]