本地裙褂店老字號鴻運繡莊，喺上個月首次推出Hello Kitty裙褂系列，有Kitty陪住出嫁，真係夠晒破格！Hello Kitty就話係貓，唔屬於十二生肖，但如果遲啲喺裙褂繡上布甸狗、Melody等，又狗又有兔，怕唔怕同新娘子八字相沖呀？動新聞請來堪輿學家麥玲玲，仲有資深裙褂師傅黃國興同我哋破解裙褂禁忌同迷思。
對於將吉蒂貓繡上裙褂，玲玲師傅叫大家唔使擔心，「係玄學上嚟講，卡通人物始終冇靈動力，唔需要介意，好似犯太歲嘅話，戴卡通公仔飾物都幫唔到，飾物要真係顯示到動物形象先有殺傷力！」但師傅話唔少人容易忽略穿着裙褂嘅禁忌，例如訂造裙褂千祈唔好造袋，因為有袋就代表袋走娘家或者夫家嘅錢。試褂唔會全套一齊試，多數會上下分開試；仲有新娘着裙褂前，記得要以紅色睡衣打底。
講到裙褂，唔少人會聯想到褂等於昔日產物，兼且講究傳統，偏偏鴻運繡莊黃師傅鍾意打破規限，設計具時代感嘅裙褂。點解師傅會萌生設計Hello Kitty裙褂嘅念頭呢？原來係因為一個人－－黃師傅嘅囡囡！十幾年前，囡囡同師傅講，「我好鍾意Hello Kitty，你又話識造褂，咁我第日嫁會唔會有套好特別嘅褂呀？」就係咁，呢位爸爸將阿囡嘅說話放喺心上，去年付諸實行，同Sanrio公司接洽。對方對Hello Kitty裙褂構思非常受落，一拍即合，點知做落先知道原來一啲都唔容易！
擺隻貓貓上裙褂話唔介意，但係有啲習俗，各位準新郎新娘都要注意！黃師傅提醒，新娘着裙褂時，裙邊一定要到腳背。而裙褂、馬褂上嘅龍唔可以反天，既唔美觀又唔合乎傳統；褂上如果有龍鳳，就要一雙一對，龍亦唔應該細過鳳。坊間有唔少關於裙褂嘅傳言，但師傅澄清有啲講法並唔正確，例如裙褂衫腳要平，代表婚姻路平坦，水波腳就有波折，師傅話其實荷花邊解圓滿，波浪係指褂上嘅拉鏈位，「拉鏈位千祈唔可以手工差，如果彎彎曲曲，意頭就唔太好。」又有人話褂只可以出嫁嗰日着一次，到晚上唔好再着第二次，師傅指以前裙褂係飲衫，擺酒、斟茶可以着，甚至新年着都冇問題，你鍾意就得。
其實着裙褂出嫁係喜慶之事，跟足傳統都係想攞個好意頭，無需過分介意，最緊要大家開心！