彭順（6163）上市！大家唔好諗多咗，呢個「彭順」同大馬影后李心潔老公彭順冇關係，唯一有關就係大家都係來自馬來西亞。
彭順其實係巴士廠商，聯合創辦人彭新華、彭中庸係堂兄弟，彭新華嘅千金彭慧嫻就係行政總監。
彭新華位大公子彭志祥未入董事局，只做總經理，但彭志祥最近兩年喺龍頭車廠Scania工作，今年4月先返去家族公司，日後應該會好幫得手。
彭順噚日舉行招股記者會前，請記者遊巴士河，搭自家製造嘅開篷雙層巴士，由中環去金鐘，可惜因為兜路去灣仔，經過會展，撞正星期日下晝大班遊客喺金紫荊廣場觀光，幾十架旅遊車塞死條路，所以原本15分鐘有找嘅車程，足足用咗45分鐘。好在噚日都算幾涼爽，否則仲塞埋車真係雙重難受。