網上直播越嚟越流行，由打機到球賽乜都可以直播，有冇諗過連舞台劇都可以用手機睇？西九文化區下月4至6日將喺西九項目辦公室天台上演一連3場嘅著名希臘悲劇《安提戈涅》（《安蒂岡妮》Antigone），由於場地所限唔會公開賣飛，但會喺西九YouTube平台直播，如果天公造美，觀眾仲可以睇到維港黃昏美景做劇場背景㖭！
西九表演藝術行政總監茹國烈話，呢套有200幾年歷史、講述希臘神話宮廷權力鬥爭嘅經典悲劇，由香港導演鄧樹榮同北京白光劇社合作重新演繹，原本只喺北京上演，西九特登邀請佢哋來港特別演出，劇目以普通話演繹，但有中英文字幕，可能會係香港第一次有舞台劇網上直播。西九出年更加碼直播舞蹈同戲曲表演試水溫，期望將來文化區落成後會有更多免費劇目網上直播，甚至同外國劇團組成直播聯網。