「Boe媽」呢個名，千禧年嗰陣喺娛圈久唔久就會聽到呢個名，「Boe媽」顧紹芬廣結圈中人好似章小蕙、譚玉梅及楊恭如等，當年Boe媽更喺酒會上介紹咗姪女Cindy(顧美蓮)俾彤叔識，Cindy更成為彤叔嘅紅顏知己，彤叔4年前中風要入院，之後就冇見過Cindy嘅蹤影…
點知日前Boe媽主動搵傳媒報料，聲稱被親姪女Cindy趕出舊居，指Cindy話新世界要收番Boe媽住嘅地方，叫Boe媽搬出搵地方租住，Cindy仲話幫Boe媽畀6千蚊租，Boe媽自己畀1萬蚊，不過Cindy俾咗一年，幾個月前就開始冇畀錢，同Boe媽斬纜，報道更指，關係決裂係因為Cindy懷疑Boe媽養「小白臉」貼錢捧一個37歲嘅大陸男歌手，Boe媽接受《蘋果》訪問就大罵Cindy「反骨」、「過橋抽板」，連親姑媽都唔認。
Boe媽來自哈爾濱，家中有9兄弟姊妹，佢就排行第八，老公姓夏，婚後育有兩個囝囝，1992年嚟香港，老公喺大陸做化工廠及製衣生意，有報道指由於Boe媽叔父係銀行董事，所以Boe媽同部份富豪名人好熟，又廣結娛圈嘅人，風光嗰陣，經常出入半島酒店同馬場，月花6位數字，更有傳佢試過四圍派錢。