本地騎師近排買少見少，能維持經常出賽的其中兩人是見習騎師黃皓楠及蔣嘉琦。
結果上述一對師兄妹這天先後贏馬揚威谷草日賽，黃皓楠第四場爆冷贏何良馬房「太陽旺旺」，到第八場三班1200米，嘉琦BB復策姚本輝馬房「翡翠紅星」即勝，守前列好位下贏個半馬位，單Win及組合獨贏A2分別派65及19元正，此駒跨季連續11場不贏有位全上名，得3冠7亞1季，準到冇朋友。
五歲馬「翡翠紅星」絕對是大熟大勇兼忠心準繩的新典範，上名跑道遍及田草、泥地與谷草，今仗係首度跑快活谷即勝，並與蔣嘉琦合作兩戰保持不敗，賽後「翡翠紅星」馬主董中浩太太董吳玲玲，更吻賀嘉琦BB以示鼓勵。
另一方面，「翡翠紅星」練馬師姚本輝自9月下旬以來瘋狂贏馬，今季頭馬增至13場，馬房近三次賽事都有馬贏，距離更新後的續牌最低指標16Win只差三場。
呢場二至四名順序為「罕曾見」、「中華寶貝」及「開心遊戲」，當中有冷有熱，四重彩派三萬四千幾。