曾活躍娛樂圈嘅「金牌媒人」Boe媽（顧紹芬），日前爆出同已故新世界發展名譽主席鄭裕彤（彤叔）嘅紅顏知己、親姪女顧美蓮（Cindy）為錢反目，Boe媽數臭Cindy飛上枝頭就過橋抽板，收樓兼閂水喉。
Boe媽前日又自爆朝早收到陌生男子來電，語帶恐嚇叫佢收口，為咗人身安全，前日佢搵咗旗下內地歌手羅邏聖陪同，到九龍城警署報警備案。Boe媽未行入差館已經大發牢騷：「佢𠵱家同我翻臉，為咗收番層樓租畀人。佢好細，我就對佢好好，佢話孝順我，我𠵱家未老，佢都唔孝順我，將我趕出嚟，佢冇良心。」
「天會收你」
至於陌生男嘅恐嚇電話，Boe媽好勞氣咁話：「我老公有鼻咽癌，囝囝又冇書讀，我又有『三高』，我驚乜嘢？對個老人家做呢啲嘢冇意思。我同電話個男人講，我嚇大，我唔驚，最多畀埋條老命你。你搞死我，老天會收你，人在做，老天在看，你做乜老天都知。為咗家人安全，我報警。佢唔好搞我家人，佢搞我，要整死我，我等佢。」Boe媽報完警低調離開，事後聯絡佢，佢突然封嘴：「唔提啦，唔想再講。」
撰文：馮仁昭
