上星期三左丁山寫「廉航經歷」，刊登後，有讀者來函，指左丁山可能混淆咗「香港航空」與「香港快運」，「快運」係「航空」嘅子公司。左丁山以前從未幫襯過香港航空，係肥仔K代上網訂機票，翻查機票資料，確係坐HX 670去鹿兒島，即係Hong Kong Airlines，不是Hong Kong Express，左丁山於是去問幾位朋友，原來冇一位知道「航空」與「快運」兩間公司之別，均誤以為係同一間廉航，依家可能清楚多啲嘞。但左丁山坐香港航空，要坐前排與訂午餐，均須付款，本質上係似坐廉航。
左丁山太太有大學同學自加拿大回港，跟住與中學母校真光中學嘅同班同學近三十人，結伴去沖繩島一遊，坐嘅就係香港航空，同樣遇上颱風海馬，原定十月二十二日回來，班機給颱風吹走了，要到十月二十五日才有班機接佢地回港，趕住買早啲機票呢？香港航空話要每張一萬四千元，於是大家都真正明白何謂「海鮮價」。
海鮮價絕對反映短期需求狀況，係sellers' market嘅產品，你想急呀，價錢就係咁貴嘅咯；唔鍾意呀，等吓先啦，想知道時間是否寶貴，海鮮價係最佳反映。
小G係日本迷，睇到左丁山寫城山酒店與白水館，想去試試，但佢每年放大假都在十二月底連接聖誕假期，可以連續放十幾日，不過有一利亦有一害，就係放假適逢旅遊旺季，價錢零舍貴好多。佢特登上網搵指宿白水館與鹿兒島城山酒店嘅網頁，查一查聖誕節價錢。嘩，不得了，到時要幾萬日圓一晚，一月一日更要12萬日圓，比十一月份淡季貴三至四倍，小G嘆一口氣：「點去呀！」正是如此，家有教師就有此煩惱，教師放假之時，便是旅遊旺季，出外要付出比平時多兩三倍價錢，而得回嘅酒店服務及食物水平往往更差。沙田陳太嘅細佬嘅同學夫婦就精嘞，趕在十一月放假，坐香港航空去日本（機票夠平喎，連午餐都唔訂），玩番個零星期先至回港再搏命搵銀。去開外地有癮，於是左丁山又訂機票去台北玩三日，十一月下旬成行，上一次去係2008年馬英九登基之前咯，馬先生在任8年不成大事，將政權拱手相讓予民進黨，於是國民黨即刻俾民進黨政府玩殘，竟然窮到無糧出，要向郭台銘媽媽借錢出糧俾黨工，百年大黨淪落如此，孫中山蔣介石父子不亦悲乎？我地去台灣旅行，自然只係吃喝行街不理其他，老友曾智華退休後，成日去台灣，成為台灣旅行達人，佢話台灣樣樣好，就係經濟發展唔好，故此物價便宜，最啱香港人去旅行喎！