李樂詩（Joyce）上周三43歲牛一，已有兩子的她，腹中再陀囝囝本來預產期撞正自己生日，但採取自然分娩的Joyce順其自然，幼子前日順產，重7磅2安士，母子平安，取名Theodore。決定三子夠晒數的Joyce，隨即宣佈封肚。
辛苦15分鐘
由於Theodore遲過預產期出生，Joyce上周生日時挺着巨肚和老公Ted拍拖撐枱腳。升呢第三任媽咪的Joyce，昨在電話中難掩興奮：「Theodore預產期前，撞正8號風球同黑色暴雨，老公又唔喺香港，我都擔心佢提早出世，如果我同佢唔同日子生日，可以分開慶祝。」生過兩胎，Joyce再生都沒難度：「今次第三次自然分娩，去到醫院入產房，醫生飛車過嚟，我等一陣就push，用平時方法，丹田唱歌咁用力，結果push咗15分鐘，雖然辛苦，但算快手生咗。」
Joyce形容Theodore鼻大大，她搞笑說：「第一眼望佢，唔似我或者老公，佢似公公。BB個鼻幾大似成龍，我同老公嘅鼻都唔大，冇理由執錯畀我哋，明明睇住佢出世。」
送禮給哥哥
另外，Joyce很有心，預早為Theodore準備了見面禮送給兩位胞兄，兩位哥哥都大讚細佬識做。Joyce又指長子然熙和二子然正的名字取材自皇帝康熙和雍正，幼子有意參考乾隆，但仍未決定。
採訪：陳杰
