近排賽日頭場好多時都係雷神莫雷拉贏，不過這天快活谷日馬就唔到佢威，反為由佢鄉里蘇兆輝做主角，猛人輝策騎文家良馬房「天賦致寶」出戰第一場五班一哩，結果人馬重逢擦出火花，6.2倍開齋，組合獨贏A1派15元正。
猛人輝剛周三於谷草憑何良馬房「聚歡笑」打開今季重臨客串勝門，事隔四日於同一馬場再上陣，佢策上季人馬合作一戰田草1800米得第四之「天賦致寶」，故劍重逢改跑谷草一哩，猛人輝留到最後百幾米後上一攻而破贏頸位，盡顯個人功架，此駒在港第23次出賽首度入三甲即開齋，「天賦致寶」馬主是曾參選04年港姐的余姸慧(該屆冠軍是徐子珊)，賽後她高高興興拉頭馬，繼 2012年「天賦傳奇」後余姸慧再有馬贏。
今場二、三名由一對冷馬「幸運波」及「荷蘭風車」順序瓜分，雷神今場接手著名股評人孫柏文名下「樂家將」被捧成一面倒大熱，結果此駒有前冇後，末段腳軟只跑梗頸四。頭四名賽前都係未勝馬，四重彩派一萬八千蚊多啲。
賽前孫柏文在fb說「樂家將」跑快活谷，只因嚟緊11月冇沙田五班草地1600米賽程，所以才跑快活谷，仲話自己隻馬大熱，叫大家「自己小心啲」，似乎冇乜信心，果然一語成讖。