早前食環署職員罰咗個倒水老婆婆千五蚊，搞到阿婆喊晒，西班牙就似乎有人情味得多，好似西甲皇家蘇斯達（圖），有位35歲露宿者帶住隻狗，喺皇蘇主場門外瞓咗八個月，皇蘇冇趕走呢位露宿者之餘，仲請佢做場地保養工人，初步合約兩個月，做得好仲可以延期，希望佢搵到錢解決三餐一宿問題啦；皇蘇好人好事，上周五場西甲作客2:0擊敗雷加利斯，拎到兩連勝㖭。