【本報訊】西營盤是典型老區，皇后大道西一帶的唐樓都是海味乾貨店，是老鼠開餐勝地，店主紛紛養貓滅鼠，造就每店一貓的佳景。店舖貓由最初捉老鼠的工具變成為店主的寶貝，各家店舖貓猶如皇帝出巡般穿梭大街，吸引貓奴聚集該區玩貓和拍攝。
「捉老鼠畀我睇領功」
葉老闆開店16年，養貓逾10年，店內的兩隻貓一肥一瘦，人稱肥仔和奀妹，是鎂光燈下的焦點，採訪期間有粉絲駐守店外高舉相機。「西營盤海味店九成都養貓，養嚟捉老鼠，肥仔捉完就會畀我睇，領功」，葉老闆提起貓兒便一臉甜笑，「玩開有感情，人同動物都有感情，佢又得意」。
葉老闆笑言，肥仔才是店中大老闆，客人和街坊只認識肥仔，不認識老闆，「佢先係主人，日日服侍佢；我哋忙時佢哋巡街、坐喺出面，佢哋先係老闆」。店舖太子女說，一到農曆新年，肥仔會收到利是，「街坊畀佢買貓糧，我都未有利是，冇計，佢太出名」。
兩隻貓是西營盤小明星，「日日都好多人圍住佢、影佢，有人結婚都返嚟抱住肥仔做伴郎」，貓兒可愛又淘氣，兩隻貓跑去捉鄰居養的小鳥，又偷食人家的乾瑤柱，可說是街坊間的開心果。
經營海味店37年的唐小姐，也僱用了阿旺做「店長」達12年，「佢叫阿旺，旺丁旺財嘅旺；又捉老鼠，又招客入嚟，又同佢哋玩，咁咪旺到我囉」，她笑言養黑貓因為殺氣大，毫不忌諱黑貓不祥的傳說。阿旺是性格巨星，有一次被鬧，一怒之下離家出走7天，「當初只係捉老鼠，但養得耐有感情，一次返嚟唔見咗佢，我畀3,000蚊都要搵佢返嚟」，成功尋貓，可見西營盤的鄰里關係和睦。
■記者梁佩珊