綽號「猛人輝」的英國前冠軍騎師蘇兆輝，剛戰谷草夜賽憑一檔馬「聚歡笑」開齋，今期(30日)佢又同一檔馬有緣，竟有「天賦致寶」、「中華寶貝」、「陀飛輪」三匹座騎抽正一檔，甚至「凱明神駒」二檔亦甚佳，其中「陀飛輪」跑番前仗大勝的路程谷草1200米，有力替蘇兆輝增添進賬。
「陀飛輪」列陣第十場二班1200米，前仗贏同程總時間1分10秒17，是當晚四組同程中最快，屬高水準締速賽事，難怪亞軍「手到拿來」及季軍「有心人」翌仗分別入Q及贏馬。記得當晚贏馬之役，「陀飛輪」想避開影子，成隻馬彈起四腳凌空離地跳過終點，可見未成熟仍大有進步空間。
上仗「陀飛輪」配吳嘉晉轉跑田草，可當作回氣之部署，敗績不必介懷，今仗改配蘇兆輝重返谷草1200米且抽得一檔，此駒以往三次排五檔以內跑谷草獲兩勝一殿，加上跑日賽應不會再跳避影子，力足取得本身今季第二Win。