從大阪伊丹機場坐的士到中心區大阪站梅田Hotel Granvia，約三十幾分鐘，都幾方便，酒店生意好好，地下登記櫃枱人來人往，川流不息，應該係入住率好高嘅酒店。上到房間就打個突，廁所浴室還算係三星酒店標準，但房間內一張雙人床幾乎已盡佔面積，走廊既短且窄，因而無衣櫃，只有幾個衣架，走廊擺咗行李，就要跨步而過，似係大廈劏房多過似係酒店房。算嘞，住一晚唔駛怨咁多，即使租金係28700日圓（連早餐）。
落到樓下就方便到極，走過大堂行出去就係大阪火車／地鐵交匯站，人多潮湧，行慢啲都會被人撞到。酒店位於「南口」之右面，左面就係大丸百貨，大丸因日本經濟不景，已不復當年勇，有三四層分租一半樓面俾Tokyu Hands，有兩層係餐廳食肆專用，左丁山走去地鐵站望吓，人流多過九龍塘站早上八時，都係無謂在此搭車去心齋橋嘞，就在大阪中央噔內行商場及大丸，食晚飯，感覺係食店價錢比鹿兒島城山酒店還要貴三四成，水準尚有不及㖭，大概係租金昂貴之故。大阪始終係日本第二重要城市，非鹿兒島可比，對喜歡熱鬧潮流之遊客嚟講，鹿兒島只是鄉下地方。
次早未夠六點就起床執拾，趕住七點在酒店19樓食早餐。原來人同此心，未夠七點已要排隊進內，一睇，所謂自助早餐，係大學飯堂水平，求其揀幾塊麵包填吓肚就算，以後不會再來。好彩出門得早啫，的士去關西國際機場只係在未上快速公路之前略有阻滯，四十幾分鐘後就抵達。ANA櫃枱冇乜人，以為順利到極，點知地勤小姐話，機票未曾確認，無效。嘩，這還了得，即刻驚動到三四位ANA地勤人員走埋櫃枱與左丁山講道理，好彩，在城山酒店之時，因為想回港後寫封電郵去表揚嗰位Front Desk小姐，臨走問佢攞咗張咭片，於是立即拿出來，請ANA啲小姐打去鹿兒島用日文講清楚，佢地講咗十幾分鐘之後，向左丁山交代，城山酒店人員過於匆忙，冇將左丁山所簽之信用咭，在電腦輸入ANA賬目，所以電腦mark住unpaid，即係冇買到回港機票。唔通又要在大阪住多一晚？ANA話：「現在付款都得嘅。」於是即刻簽咭，即刻有票，兩人要29萬Yen。真係肉隨砧板上，任斬，肉赤都要簽咭嘅啦。還算ANA有良心，收足錢，准我地揸住張Y Class機票進入貴賓候機室，在裏面食番一啲幾好味嘅肉丸炒麵及日式咖喱飯。一場颱風吹到左丁山不知方向，及用多40萬日圓買單程機票，支付一晚酒店租金，晚飯及三程的士費。回來後問匯豐保險，得知旅行保險最多賠500港元，真係得啖笑。