八方噚日先同大家回帶，睇番新民黨葉劉淑儀5年前話有信心入閘，咁啱噚日佢又話準備緊選特首，真係相當有趣！而呢兩日嘅焦點相信都係特首戰正式開鑼，而5年前嘅今日，尚未正式參選嘅CY被傳媒爆醜聞，而呢份傳媒，係《成報》喎，係咪更加有趣呢！
嗱嗱嗱，近期不停向梁振英甚至京官發炮嘅《成報》，當年今日用頭版報道，話明天更好基金行政總裁鄧淑德，係佢「關係密切的紅顏知己」，話雙方好親密，女方仲會瞓身助選，成為梁振英競選辦重要一員。報道出街後，鄧淑德否認，梁振英就揚言要向《成報》發律師信；最後呢，《成報》出聲明表示遺憾了事。
其實報道內容唔係八方想講嘅重點，反而關注，5年前被梁振英用律師信威脅嘅《成報》越戰越勇，原來佢哋嘅恩怨，5年前已種。