青年新政游蕙禎一直畀人話選民支持佢其中一個原因，係因為比較年青同埋外貌討好，佢嘅言論不時引起爭議，衣著都受到唔少人關注。立法會主席梁君彥星期二拒絕青政2人再宣誓，2人前日照樣準備宣誓，其中游蕙禎雖然明知要成功闖關入會議廳如願宣誓有難度，亦可能要面對一啲肢體衝撞，但佢仍然好似上周三一樣，著比較斯文嘅連身裙現身，上周三係藍色，噚日係黑色，都算成熟莊重喇啩。
上周三佢喺冇得宣誓後，換咗另一條睇嚟後生啲嘅白衣領藍色裙見記者，八方見佢星期二反駁梁君彥就著返嗰條白衣領藍色裙，而前日就成日都只係著一條裙，上午闖關、下午交代事件以至晚上出席立會外集會，都係一身全黑示人。今次冇換裙，唔知係怕畀建制派話佢唔尊重？