股評人孫柏文講股票，成日叫人一注獨贏，佢啲股票貼士準唔準，老講實，就好似大部份講馬佬貼馬咁，有得有唔得囉！
不過如果孫柏文長期叫人一注獨贏佢隻愛駒「樂家將」，咁就大鑊啦，呢匹澳洲馬由後生跑到現在6歲中年，21戰勝出率係零，長捧真係輸死未天光。其實上季最後一戰，「樂家將」已瀕出局邊緣，評19分低於21分淘汰線，結果嗰場力戰得亞軍，加兩分至21分，剛好合資格繼續服役，避過強制退役。
「樂家將」將於周日（30日）再戰，角逐快活谷頭場五班1650米，抽到貼欄的2檔，更重要係冠軍騎師雷神莫雷拉居然肯騎，睇番隻馬本月中得季軍只輸半馬位，係歷來最接近最有威脅一仗，的確有進步，相信因為咁先被雷神睇中，今次可以話係真正一注獨贏機會。