摩連奴帶領嘅曼聯周三喺英聯盃反底，精銳盡出之下靠桑馬達建功，主場以1:0擊敗派二隊嚟踢嘅曼城，打入八強，下圈會鬥韋斯咸。摩佬鬆口氣，承認上場聯賽被車路士大炒唔係應有表現，要用呢場曼市打吡嘅勝利，向紅魔球迷道歉。至於曼城主帥哥迪奧拿就淡然面對連續六場不勝嘅劣勢，仲話呢場比賽會畀到一班小將寶貴嘅經驗喎。
出全力1:0贏曼城二隊
曼聯喺周日英超被車路士炒四蛋，摩連奴真係好大壓力，所以周三呢場英聯盃16強對曼城，都唔敢輪換球員，迪基亞、保羅普巴、馬達同伊巴謙莫域等全部擔正，仲搵埋經驗豐富嘅卡域克鎮守中場。除咗高度重視呢場曼市打吡，摩佬仲喺本場刊度撰文，下詔罪己，就上場大敗向球迷道歉。
換邊後，曼聯搶攻，49分鐘先有普巴接應伊巴斜傳入禁區起腳，但被韋利卡巴尼路封到。54分鐘，伊巴左路傳中，前柱嘅安達靴里拉一漏，馬達喺無人看管下為曼聯射成1:0。之後曼城換入史達寧同阿古路反撲，而曼聯就調入舒尼達連同連格加強防守，最後紅魔維持1:0勝局，打入八強，會喺下月底迎戰韋斯咸。
雖然今場贏打吡，但摩連奴賽後都向球迷做出0:4嘅手勢，再雙手合十，為上仗大敗向球迷道歉。佢之後話：「球員全力以赴，我哋值得贏波，覺得好開心。上輪聯賽，所有嘢都唔如意，但我哋都係專業嘅。球迷因為大敗而失望，但相信今場會掃清佢哋嘅不快，因為我哋喺一場淘汰賽同打吡戰入面贏波。」雖然曼聯今季成績反覆，但只要卡域克上陣嘅比賽，球隊全部贏波。
不過，摩佬噚日收到壞消息，因為佢喺對利物浦前評論球證安東尼泰萊，家陣被英足總檢控行為不檢；佢最遲可以喺下周一認罪或上訴，若果告得成，可能被罰停賽。
哥迪奧拿笑對六場不勝
其實曼城主帥哥迪奧拿賽前嘅壓力唔少得過摩連奴，但哥帥堅持一貫策略，喺英聯盃畀啲副選同小將上陣，結果輸波出局。佢賽後話：「我哋係六場不勝，走勢唔太好，但我哋只喺一項比賽出局，仲有三個冠軍可以爭。我哋派咗支年輕嘅球隊嚟踢，呢場係寶貴嘅經驗，費蘭度法蘭斯高踢得非常好，一直帶住班後生仔。」曼城下場英超會作客西布朗，睇吓可唔可以終止六場不勝走勢啦。