紀惠集團行政總裁湯文亮一向有獨特見解，佢之前一篇《細價樓將會在三個月內爆煲》震動港九新界，噚日佢有篇《特朗普勝券在握》，睇到華華個心真係離一離呀。
湯文亮自嘲話，雖然俾老友話包拗頸，但佢依然認為美國共和黨總統候選人特朗普，有較大機會勝出做總統。佢指出，特朗普醜聞不斷，仍有45%支持率，特朗普只要喺大選前三日發動總攻擊，質疑希拉莉健康狀況，就可以入主白宮。
講開又講，最新民調顯示，特朗普喺頭號搖擺州佛羅里達州嘅支持度，高過希拉莉，搞到有「特朗普指數」之稱嘅墨西哥披索兩日唔見1%，唔通湯文亮今次真係有機會講中？
其實喺今次美國大選預測上，湯文亮並唔係孤身走我路，「末日博士」麥嘉華、《信報》創辦人林行止都睇好特朗普當選美國總統㗎。