何謂拿屎上身？請看特首女新鮮熱辣的示範：立法會宣誓風波越搞越混亂，幸災樂禍的她面書留言「好睇過睇戲」，結果被書友書敵齊心合力串到裙拉褲甩，「禮賓府大龍鳳連續劇咪仲好睇」的反應如潮湧。俗語小不忍則亂大謀的「小」，番書女切勿誤會是帶懶音講粗口，規勸年輕人冇地方扑嘢千祈咪通街打野戰，以免舊陣時保留畀基佬的「粗獷性行為」控罪加在頭上；臨近哈囉喂這種大時大節的敏感時刻，更加必須謹言，慳得過最好飛去異國會合親生姊妹歡度良辰，手提行李遺留機場安檢大不了去尼文馬可斯買過，千不該萬不該騷擾市民已經塵封的集體回憶，喚醒掌摑龍蝦老母的一幕，教人重新盼望下集快些上演。何況那班議員就算醜態百出，話晒大部份都係叔伯阿姨，斟茶拜同一個方丈做契爺的，人家對號入座嬲咗你都唔知，飲宴派對隨時撞口撞面，睬你唔係唔睬你又唔係，你話幾鬼尷尬。
這種冇腦的開口及着脷，其實同特朗普有幾分相似，他老先生電視辯論第三回合大言不慚願賭不服輸，疾呼不會接受賽果，等於事先張揚自己大勢已去，蠢得這麼交關，企圖補鑊的團隊束手無策，自備哈哈鏡公諸於世，對手慳水慳力。我忽然想起網上那些才高八斗的異士，一天到晚在專欄留言版惡毒鞭撻作者呃稿費，「橫又吹水掂又吹水，點解佢哋有錢收我冇」的酸葡萄呼之欲出，但你只要略略欣賞他們的文筆文品，已經完全明白點解。文壇新貴卜戴倫名句「答案在風中飄揚」都話呃你十年八年（ok，計計埋埋頭尾五十年），唔似得他們現兜兜人肉示範。