在城山吃過鐵板燒，到露天風呂浸溫泉享受清風，遙望櫻島之際，得知香港星期五（十月二十日）多數會掛8號風球，心知不妙。次日早餐後便與親戚等人駕車往指宿，因無快速公路，只能行「國道」，時速在四十至五十公里之間，只好跟車龍慢慢行。日本GPS好先進，輸入電話號碼就有路線圖，並有英語聲音提示左轉、右轉。親戚根據香港一本旅遊書，輸入指宿「池田湖」電話號碼，預備路經池田湖一遊，再去目的地白水館。行呀，行呀，中途見到一個路牌指示去池田湖要右轉，但GPS指示直行，點好呢？還是相信科技啦，點知越行越唔對路，覺得唔妥，卒之照指示到達電話號碼所在地嘞，原來係指宿市政府辦公地方！硬着頭皮走入去問，一位識講一半英語嘅靚女獨自走出嚟同我地用日文輸入「池田湖」，非常幫手；與佢互相鞠躬之後再揸車去，果然係去番二十分鐘前見到嘅池田湖路牌，嗱，盡信書不如無書就係咁解嘞！大罵嗰本香港鹿兒島導遊書誤導之餘，又拿出在紀伊國屋買嘅一本日本導遊書，輸入「池田湖」電話號碼，呵，電話號碼與香港嗰本一模一樣，你估邊個抄邊個呢？
在池田湖影相，到此一遊之後，上車往白水館方向，欲沿途停低食碗麵，點知此區只見屋，不見人。間間地舖烏燈黑火，食肆不知何處尋，好不容易見到一間居酒屋，親戚大喜，立即停車走入去試探，誰知有人手指指，係「貸店舖」，即此處出租咁解，可見指宿市極為清靜，生意難撈，市面蕭條之極。
到了白水館，左丁山快步入內登記，唔駛三分鐘，旅遊大巴殺到，幾十名日本遊客一湧而入，左丁山好彩行快一步，可以早啲入房。去年住貴價向海「和式」房間，起立不便，今年識得慳咯，要一間洋式向園景房間，連早餐及最貴價晚飯各一，「兩人前」價錢係32,400日圓（按：晚飯有不同價錢供客人選擇），同香港酒店價比較，一啲都唔貴，淨係餐晚飯都唔止此數啦，何況額外利益多多，白水館有三大溫泉場所（包括熱沙浴），廣濶亭園，綠油油大草地上有數十棵細心剪裁嘅羅漢松，晚上打燈映照，如入童話境界。晚上飽吃和牛火鍋，一級壽司刺身及黑豚東坡肉（日本名稱唔記得咯）之後，在亭園散步半小時，十點幾就行入露天風呂浸身，嘩，頓覺輕鬆無比，回房上床前例牌量度血壓，居然係115-65，創近半年新低，心情大悅，一覺到天明。