本土派當道，就連財爺曾俊華都被勁敵葉劉淑儀揶揄，打住本土旗號冧粉絲，估唔到連港大校委會主席李國章（圖），都自我定位為本土派，非關理念立場事，而係李氏家族六代扎根香港。
「沙皇」接受前立法會主席曾鈺成主持嘅商台節目《鈺成千里目》訪問，曾主席談及李氏家族好多人任公職，李氏家族實情係咪有做官同做公職嘅文化呢？亞瑟王話唔係，強調家族六代扎根香港，「所以我哋真係本土派」，而家族一直好重視教育，但下一代要做乜都係睇佢哋興趣啫。
咁極度霸氣嘅「沙皇」花名係點樣嚟？李國章話教得書一定有花名，而教育要有自己宗旨同信念，要強烈表達，「咁人哋咪覺得你好似霸道囉」。作為李國寶細佬嘅佢仲話，既然自己係細嗰個，會俾人蝦，「如果你唔大聲啲就無人理你」。
佢仲話家族中人人有唔同意見係冇問題，至少可以吸納同反思，若然個個意見一樣就好悶嘞。