全城噚日焦點，都放咗喺退休法官胡國興嘅記者會，睇吓佢有乜參選理念……至於勝算，下一步至算！而喺記者會之中，有一對男女好神秘，唔係嚟採訪，卻坐足全程；記者問佢哋點稱呼？男嘅話姓何，女嘅話唔識胡官，只係嚟睇吓，好神秘咁喎！
八方細心睇一睇，男嘅係何京文大律師，係香港會計人員總會名譽顧問，唔少建制活動佢都出席過；女嘅越睇越面善，之唔係張德熙太太張伍翠瑤，佢好似梁粉嚟㗎喎，點解會喺到嘅？莫非……
與其估估吓，八方直接問張太，佢證實現身記者會，「咁啱有朋友喺嗰邊開會，話胡官有個活動，咪去聽吓，都唔知現場係咁嘅情況。」雖然路過，卻坐足全場，佢話想聽多啲唔同想法。
佢強調以個人身份出席，之但係佢係梁粉喎，上屆仲係梁振英競選團隊，今次咁樣路過，唔驚俾人覺得嚟刺探軍情？佢話梗係唔係，「去得嗰度就全世界都知啦」，話唔想影響主人家，所以冇同記者說明身份。咁聽完有冇改變對CY嘅支持度呢？佢話冇，始終覺得CY幾好。