特首選戰終於鳴第一槍，退休法官胡國興表態後，全城都等緊財爺鬍鬚曾講兩句，不過佢就繼續唔知等乜，而另一個神隱好耐嘅鬍鬚叔叔噚日就大模斯樣喺金鐘出現，佢就係財務匯報局主席潘祖明（John）。
John潘極之低調，好日都唔出現，噚日傍住另一個鬍鬚叔叔、財匯局行政總裁衛皓民（Paul Winkelmann），落力宣傳香港要有獨立於業界嘅審計監管機構，希望政府盡快提交改革草案。
搬「公眾利益」擋駕
噚日佢變埋「好打得」，被問到立法會拉布會唔會影響改革進度，同埋點樣回應業界不滿財匯局將來權力過大，John潘強調，財匯局只係改革嘅其中一個團體，條例點樣寫，一切由政府決定，又搬埋「公眾利益」呢個神主牌出嚟擋駕。總之言下之意，佢哋只係有份參與，政府先至係推手喇。
John潘最為人熟悉，當然係佢嘅舊東家思捷（330），當年佢同邢李㷧、高漢思「三劍俠」創出思捷黃金時代，點知今年初佢被稅局追繳入息稅，不服上訴，先爆出原來當年雙方係不歡而散，高漢思畀咗一筆「分手費」要佢「安靜地離開」。John潘離開思捷8年，家陣專心做財匯局主席，同埋積金局非執董。