今年娛圈喜事重重，藝人鍾嘉欣、楊怡、林心如、陳妍希等紛紛出嫁，有冇發現佢哋除咗着靚靚婚紗，都有跟返中國傳統着褂或者繡和服呢？原來喺90年代，個個對婚紗趨之若鶩，十個都無一個着褂，搞到裙褂業差啲沒落！全靠楊千嬅喺2009年結婚嗰陣，着褂王影婚紗相，先救返裙褂業！
「嘩！原來褂咁靚o架喎！」鴻運繡莊老闆黃國興師傅話，楊千嬅著褂王就畀外界有呢種感覺。除咗千嬅本身個人靚，褂王亦靚在手工。黃師傅話褂王係要人手每針每線咁繡，至少整一年半，因為褂上嘅金銀線冇穿過塊布，而係靠唔同顏色嘅繡花線定住，叫盤金手藝！
造裙褂造咗45年，接近半世紀，原來呢份係黃師傅一生中暫時做過嘅唯一工作。喺佢眼中，無論工藝或者設計上，每件褂都係一件藝術品。佢話褂上每針、每線、每幅圖都充滿無限祝福，「好似牡丹代表牡丹富貴，龍鳳就係龍鳳呈祥，五隻蝠鼠即係五福臨門，其實每位新娘着嘅褂一啲都唔簡單！」以前，裙褂仲有傳承嘅意義，媽媽會將自己嘅裙褂好好保存，送畀個女，代表將祝福傳落去。
黃師傅希望呢份情唔好消失，唔好因為傳統同老套而令裙褂沒落，又參考婚紗可以不斷有新款，覺得裙褂都唔可以一成不變，所以力求創新。除咗諗到Hello Kitty褂，黃師傅早喺09年就設計水晶褂，攞埋專利，仲新增咗金魚呢個元素。佢話最初好簡單咁諗咗四個字「十全十美」，所以就繡十尾金魚喺褂，祝新人十全十美！
從開頭對裙褂冇咩興趣，到後來愈做愈起勁，黃師傅對褂充滿熱情，仲申請將裙褂納入非物質文化遺產。佢話香港人喺保存裙褂方面，具有重大意義，如果冇香港，裙褂就會失傳。故事要講到60年代文化大革命嗰陣，黃師傅話：「當時裙褂因為繡咗條龍而畀內地禁制，所以其實上海、北京等地，之前係未接觸過裙褂係咩嚟！」佢話慶幸香港係一個特區，能夠一路保存裙褂文化，「我要話畀人聽，裙褂真真正正係香港嘅褂！」
採訪：何宛珊(表妹)
攝影：馮峰、Neo
後期：Roy
編審：Kaman、仙