特首跑馬仔賽事，隨住退休法官胡國興表明參選、特首梁振英同財爺曾俊華積極備戰，以及新民黨主席葉劉淑儀等緊位攝入閘，真係越嚟越精采。
雖然大熱CY仲未正式表態，但佢嘅囡囡梁齊昕，則搶閘為老竇搶fo，喺instagram貼出多張玉照，包括好似着住童軍制服嘅童年相，嘩，同CY真係餅印一樣……
喺各界關注胡官嘅參選記者招待會講啲乜之日，齊昕喺instagram發功，一口氣連貼好多張相，包括身處澳洲、洛杉磯、峇里等地，其中兩張喺峇里影嘅相，齊昕仲着住大露背嘅一件頭泳衣，蹲下笑晒咁玩緊象鼻。
睇立會宣誓覺得好歡樂
大家都應該好記得，齊昕連月嚟因為服用抗抑鬱藥而令身形發福，所以着住泳衣嘅佢，好明顯有「肉地」，但係佢真係唔多介意，任人評點，但最引人注目嗰張都係童年相，真係同CY一模一樣樣。
其實星期三立法會開大會，青政梁頌恆同游蕙禎喺民主派議員築起人鏈下成功進入會議廳，主席梁君彥要求兩人離場不果，最終休會收場後，齊昕已經即時喺fb發帖，話覺得好歡樂（feeling entertained），又留言：「好睇過睇戲」。唔知有佢老竇落場參與嘅特首戰大戲，齊昕又覺得好唔好睇呢？
李八方
mailto:[email protected]
