韋斯咸自從今季搬咗入新主場倫敦球場之後，就似乎諸事不順，演出唔及上季之餘，最慘嘅係自己球迷仲成日搞事㖭！好似周三迎戰車路士場英聯盃16強為例，韋斯咸喺賽前已經大鑼大鼓話，今場會有警員喺場內駐守，而球隊仲爆冷贏咗車路士2:1；不過，班「槌仔幫」球迷依然唔生性，喺比賽期間同車仔球迷開拖，除咗掟銀仔同膠樽之外，甚至有人拆埋場內張凳去掟敵對球迷；有球迷更加被銀仔掟到爆缸（圖），而一名八歲嘅車路士小女球迷仲俾七個銀仔掟中，最後警方就拘捕咗七人。
賽後，韋斯咸領隊比歷就話咁嘅行為完全唔可以接受，而球會亦發聲明譴責今次事件，仲話如果搵出搞事球迷，會終身禁止佢哋入場。