上市公司通告一向睇到人莫名其妙，威華達（622）前晚一份澄清通告應該係佼佼者。
話說威華達星期一朝早急升近七成後停牌，市傳公司得到「三馬」（馬雲、馬化騰、馬明哲）夥同恒大（3333）許家印籌備成立新證券行，刺激股價急升。
威華達前晚出通告澄清，指合資企業唔關「三馬」事，復牌後股價急跌12.7%。
但睇清楚份通告，公司話，合資企業嘅其他拍拿係恒大地產與眾安在線財產保險。喂喂喂，眾安係由阿里巴巴、騰訊（700）同平保（2318）喺2013年成立，佢話同眾安合作，又點會唔關「三馬」事呢？
眾安保險董事長歐亞平，正正就係威華達大股東，呢種咁複雜嘅關係，佢又話冇關係，咁即係點啫。
講開又講，歐亞平好耐冇在港高調現身，佢早於1998年將旗下百仕達(1168)在港上市，2011年以黑馬姿態投得深圳地王後，引來市場注意。
市場口痕友形容，歐亞平在港資本市場嘅經驗深，一眾內地富豪如馬雲、許家印等不時同佢交流投資機會，歐亞平嘅角色就如「低調殼王」高振順，專向老友介紹「筍盤」。