「為了靚靚，有人每日照鏡，為了靚靚，每日化妝扮靚」，皇家馬德里前鋒基斯坦奴朗拿度（C朗）出晒名貪靚，就快靚過佢前女友艾琳娜㖭，每場比賽都gel到個頭硬一硬。不過葡萄牙一本八卦雜誌爆料，話佢仲沉迷打botox（肉毒桿菌針），十足十香港嘅女明星闊太咁，唔知塊面係咪打得多，搞到又膠又硬，頂頭槌又會唔會增加勁度呢?
好坦白講，細細個已經睇C朗踢波，話咁快佢已經31歲，睇番佢10零歲踢緊葡超士砵亭，塊面仲有啲baby fat圓圓地，電埋髮再加少少金毛，十足十咖喱意粉。到18歲仔轉投曼聯，星味出晒嚟，特別係個頭髮gel到打風都打唔甩。當年有唔開名嘅紅魔鬼隊友爆料，半場休息有15分鐘，C朗通常用成10分鐘整番靚個頭，連費格遜訓話都好少理。
敷面膜呃百萬Like
不過大大話話都咗10幾年職業比賽，飽歷滄桑後，C朗𠵱家喺皇馬，皮膚就肯定冇以前咁滑溜，笑起上嚟雙眼仲有魚尾紋㖭。不過難得仲保持面尖尖，而且仲尖過以前，除咗勤力做運動減脂肪外，原來C朗仲有法寶：Botox。葡萄牙一本叫《VIP》嘅雜誌報道，C朗近年沉迷打Botox，定期花費幾千歐元㖭；C朗就冇親自回應有冇打Botox，不過日前佢就喺ig上載自己敷面膜嘅相，仲呃到140萬Like，話佢姿整應該都冇咩人反對。
惹皇馬球迷圍攻
其實啲錢係C朗自己，佢想點使就唔關人事。不過據報就有皇馬球迷好不滿，因為C朗開季狀態都係麻麻，踢咗咁耐都只係得兩個入球，球迷就鬧佢掛住扮靚忽略比賽咁話；甚至上仗主場對畢爾包，更加有球迷開始噓C朗。皇馬教練施丹就幫C朗反擊，話C朗有能力一場入兩、三粒，但球員總有低潮時間，到C朗入番波，球迷就會鍾意番佢。