相信噚日最爆嘅新聞，莫過於退休法官胡國興突然宣佈參選；反觀特首梁振英同疑似對手財政司司長曾俊華等仲未有動靜，查實同5年前嘅今日情況都幾似。
2011年嘅今日CY未有現身特別嘅公開活動，只係繼續佢嘅備選狀態。反觀葉劉淑儀對參選嘅態度就再趨明朗，話有信心攞到150個選委提名，仲準備11月成立參選諮詢委員會，當時豪言建制派嘅參選人會三分天下，但最終佢係攞唔夠提名嘅。
話時話，5年前未似𠵱家咁出名嘅法律學者戴耀廷寫咗篇文講CY，主要提到梁振英能夠由民望包尾變第一，係香港少見現象，呢樣嘢可能帶嚟一啲啟示，無論佢選唔選到，「對香港的政治發展也可帶來一些預見不到的後果」。戴教授無講錯，CY的確帶嚟好多預見唔到嘅後果喎！