退休法官胡國興突然話要參加特首選舉，令到呢場跑馬仔賽事增添唔少睇頭，但係咪可以將梁振英踢走？都係視乎有冇票喺手，所以下月8日開始接受提名嘅選委會先至係戰場。醫學界喺呢場選戰有極高投入感，據聞參選名單非常多，傘運醫生決戰名醫，呢30席肯定爭到頭暈。
八方問過嘞，杏林覺醒成員黃任匡話會同其他醫生非常積極考慮籌組名單參選，據知佢同佔中醫療隊召集人歐耀佳同鄺葆賢都係名單嘅牽頭人，其餘包括公私營前線醫生及醫學會會董約20人。
多人公開表明反梁
黃任匡話呀，以往唔少爭取民主嘅醫生都杯葛小圈子選委會，但過去幾年香港情況太惡劣，唔少醫生認為唔可以再置身事外，所以年輕甚至退休醫生都參選。據知名單唔只要求ABC（Anyone but CY），仲要求有真正民主制度及冇篩選嘅真普選，若特首候選人作出有關承諾先考慮提名。
傘運醫生蠢蠢欲動，名醫都一樣噃！據悉，朱建華、葉維晉同潘德鄰等7至8位名醫會組隊上陣，有成員會公開表明反對梁振英連任。而上兩屆特首選舉因為係立法會議員而自動有票喺手嘅梁家騮，卸任後據知都想有份投，暫時計劃單拖參選。2006年佢單拖參選獲1,404票，屬第3高票；如果參選會唔會表明踢走CY？佢話要視乎係咪合乎香港整體利益，但承認「踢走CY眼前睇（嚟）社會和諧啲」，佢仲自爆上屆特首選舉投白票。
與此同時，醫學會會長蔡堅都話籌組緊名單出戰，暫有10幾人，包括公立醫療醫生協會會長何鴻光同佘達明，3人上屆都當選，佢希望名單有30人。佢個人係ABC，但名單係咪以此為政綱要再商討。
上屆特首選委戰，醫學界83人爭30席，只有兩席屬於泛民。黃任匡預計，今屆或有多達100人參選，競爭非常激烈，但醫學界整體較保守，唔敢預測可以搶攻幾多席！
李八方
mailto:[email protected]