下個月初，世界排名140嘅香港足球代表隊就會喺旺角場出戰東亞足球錦標賽外圍賽次圈，同關島、中華台北同北韓爭一個出線席位。噚日港足就公佈咗20人大軍名單，除咗有陳肇麒同葉鴻輝等華將外，前幾日喺中甲幫貴州智誠升班嘅「法叔」法圖斯都有入選。
法叔呢期紅爆中甲，尾二一輪完場前入波，幫貴州以2:1絕殺天津權健，成為英雄。雖然貴州最後拎唔到冠軍，但都排第二名，下季升上中超；而法叔成季表現穩定，絕對係升班一大功臣。噚日貴州就喺貴陽市搞巴士巡遊同祝捷大會，法叔同一班球會隊友都玩得好開心。
雖然中甲球季完咗，但36歲嘅法叔未放得假住，要幫港足踢埋東亞錦標賽先。香港負責主辦呢次錦標賽嘅外圍賽次圈，由11月六號至12號期間，港足、關島、中華台北同埋北韓會喺旺角場踢單循環，最高分嗰隊就晉身下年喺日本舉行嘅決賽周，同中國、南韓、日本爭做東亞霸主。
基藍馬歐冲僅後補
喺港足20人名單入面，除咗法叔之外，仲有積施利同高梵兩名北上搵食嘅球員；積施利今季喺中超長春亞泰上陣機會唔多，而高梵就踢中甲嘅青島黃海，但可惜球隊「衝超」失敗，最後排第三。至於基藍馬、伊達同歐陽耀冲就暫時喺替補名單。排緊港超第二嘅東方龍獅係呢次港足嘅大戶，有七個人入選。