立法會一如所料，噚日繼續混亂中散場，雖則青年新政梁頌恆同游蕙禎喺民主派議員護送下成功入到會議廳，半百記者都跟住梁游衝入，令會議受阻約十分鐘先至開始，但最終都係冇得宣誓，休會告終。
而喺擾攘期間，喺會議廳內嘅建制派有乜做好？原來係趕上facebook直播潮流，好似民建聯葛珮帆咁吖，上次已經四圍拍，今次仲邀請黨友蔣麗芸、李慧琼、周浩鼎等人逐一發言，有乜內容？當然係批評民主派包庇梁游啦。黨友陳恒鑌都唔執輸，facebook直播熱血公民鄭松泰被保安包圍嘅情況。
工聯會麥美娟亦攞住手機，同郭偉強、陸頌雄等黨友以梁游身處會議廳嘅情況做背景，輪流發言批評後上載fb。
咁又咪以為得建制會直播喎。游BB喺泰博被保安包圍之時，都攞手機做fb live，唔知情人士可能以為噚日被禁止宣誓嘅係泰博㖭呀，皆因除咗入議會，梁游都靜觀其變好斯文。