貴為英國前冠軍級騎師，原籍巴西的蘇兆輝點會唔識贏馬！剛周日佢登場展開客串期兩度入Q，已交足功課，這晚轉戰谷草，第二場五班一哩贏何良馬房「聚歡笑」開齋，此駒亦告服役首勝，單Win及組合獨贏A2分別派55.5及26.5元。
四歲澳洲自購新馬「聚歡笑」過去七次出賽鞍上人都是蘇狄雄。蘇狄雄墮馬受傷休戰，此駒今次換上都係蘇字行頭的蘇兆輝，閘前被落飛黨狙擊跌到5.5倍着綠燈開跑，本身首戰谷草一哩，沿途前置跑主動，直路率先突圍後就此帶返終點，力拒雷神「通勝」衝刺贏半馬位，功勞最大者自然係蘇兆輝。
何良指「聚歡笑」原本配蘇狄雄或梁家俊，可惜二人都養傷，有位朋友推薦蘇兆輝，練者用人之際當然成人之美。何良話上季與蘇兆輝合作機會不多，希望藉今次合作成功打開缺口，彼此加強合作。何良又透露「聚歡笑」最初健康曾有嚴重問題，但上季開始漸穩定，早前谷閘走勢不錯，今仗嘗試谷草1650米，排一擋十分有利，全程慳位形勢佳，下仗仍會主攻谷草1650米。
今場同時開出巴西騎師Q，蓋跑第二的方嘉柏馬房「通勝」正係由蘇兆輝同鄉莫雷拉操刀；見習生黃皓楠座騎「我是高手」啡燈Win兼全線Ｑ亦落飛啡燈，點知姍姍來遲撻Q僅跑第三，第四名是另一後上馬「公証揚聖」，四重彩派三萬三千幾。