西甲周一舉行上季最佳陣容頒獎禮，馬德里體育會就成為大贏家，好似最佳球員係基沙文，最佳教練係施蒙尼等。但係據報上季冠軍巴塞隆拿不滿受到西甲聯賽打壓，成隊只係得美斯同蘇亞雷斯獲獎，對結果好不滿，決定杯葛周一喺華倫西亞嘅頒獎禮，美斯、阿蘇等球星就no show，只安排球會榮譽大使雷克薩奇代領獎項。巴塞嘅官方答案當然唔會咁講啦，佢哋只係話因為周中冇正式比賽，所以安排美斯、阿蘇同尼馬等主力球星有額外三天假期，美斯就決定親子樂，帶埋老婆同兩個囝囝去巴黎老鼠樂園玩，老婆安東莉娜仲上載樂園相喺個人ig㖭，叫做無聲抗議。
安歷基唔抵得
巴塞周二對愛斯賓奴合演友賽性質嘅加泰盃，結果大部份主力缺陣下以0:1敗陣，而教練安歷基對失落上季最佳教練仲有啲不滿，有記者問佢點睇，安歷基有骨咁講：「如果有20個西甲最佳教練獎，我都有份拎啩。」其實最佳陣容獎都係虛榮，成功衞冕西甲仲實際啦。